اقوام متحدہ (United Nations ) کے ذیلی معاشی ادارے نے خبردار کیا ہے کہ امریکی فیڈرل ریزرو (Federal Reserve ) سمیت دیگر ممالک کے مرکزی بینک جس طرح سے شرح سود ( Interest Rates ) میں مسلسل اضافہ کر رہے ہیں اس سے عالمی سطح پر کساد بازاری (Recession ) جنم لے رہی ہے۔ واضح رہے کہ یوکرائن جنگ کے بعد سے پیدا ہونے والے عالمی معاشی بحران (Global Economic Crisis ) کے بعد دنیا کے طاقتور ممالک کی طرف سے افراط زر (Inflation ) کا مقابلہ کرنے کے لئے مسلسل شرح سود میں اضافہ کیا جا رہا ہے جس سے دنیا مالیاتی عدم استحکام کی شکار ہو رہی ہے اور خاص طور پر ایشیائی ممالک کساد بازاری کے سنگین خطرات سے دوچار ہو رہے ہیں۔ گزشتہ دنوں امریکی فیڈرل ریزرو کی طرف سے رواں سال کے دوران تیسری بار شرح سود میں اضافہ کیا گیا ہے جس کے بعد یورپ سمیت دنیا بھر کی کرنسیز کی قدر میں گراوٹ دیکھی گئی ہے۔