آج پاکستانی اسٹاکس میں آغاز سے ہی ہیزکول لیمیٹڈ میں اچھا ٹریڈنگ اور شیئر والیوم دیکھنے میں آیا جو کہ آخر تک برقرار رہا اور آج کے دن ڈیفالٹر سیگمنٹ سے باہر نکلنے کی کوششوں میں مصروف ہیزکول 2 کروڑ 70 لاکھ شیئرز کے ساتھ والیوم لیڈر رہا۔ 2 کروڑ 8 لاکھ شیئرز کے ساتھ کراچی الیکٹرک دوسرے جبکہ 1 کروڑ 34 لاکھ شیئرز کے ساتھ پاکستان انٹرنیشنل ایئرلائنز تیسرے نمبر پر رہی۔ بینک الفلاح لیمیٹڈ اور ٹی۔پی۔ایل پراپرٹیز نے بھی ایک کروڑ سے زائد شیئرز کا کاروبار سمیٹا۔ اگر ہم سیکٹرز کی پرفارمنس کا جائزہ لیں تو بینکنگ اور ٹیکنالوجی سیکٹرز سرمایہ کاروں کی توجہ کا مرکز رہے۔ جبکہ آخری ایک گھنٹے میں پراپرٹی سیکٹر میں بھی اچھا والیوم دیکھا گیا۔ انفرادی طور پر سب سے زیادہ شیئر پرائس ریلائنس اسپننگ ملز کی رہی جس کی قیمت میں 34 روپے فی شیئر کا اضافہ ہوا۔